श्री गुरु तेग बहादूर साहेबजी यांच्या ३५० व्या शहीदी समागम वर्षानिमित्त जळकोट आश्रम शाळेत विविध स्पर्धां

 

 धाराशिव : हिंद-दी-चादर म्हणून ओळखले जाणारे श्री गुरु तेग बहादूर साहेबजी यांच्या ३५० व्या शहीदी समागम वर्षानिमित्त श्री कुलस्वामिनी माध्यमिक आश्रमशाळा, जळकोट ता.तुळजापूर,येथे आज २१ जानेवारी रोजी विद्यार्थ्यांसाठी विविध शैक्षणिक व सांस्कृतिक उपक्रमांचे आयोजन करण्यात आले.

            या उपक्रमांच्या माध्यमातून धर्मस्वातंत्र्य,मानवता,सहिष्णुता व बलिदानाचे मूल्य विद्यार्थ्यांपर्यंत पोहोचवण्याचा उद्देश ठेवण्यात आला होता.या कार्यक्रमांतर्गत वकृत्व स्पर्धा, निबंध स्पर्धा तसेच गीत गायन स्पर्धेचे आयोजन करण्यात आले.

            कार्यक्रमाचे अध्यक्षस्थान महात्मा फुले शिक्षण प्रसारक मंडळ,जळकोटचे विद्यमान सचिव तसेच माध्यमिक आश्रम शाळा,जळकोटचे मुख्याध्यापक श्री.एस.एम.चव्हाण यांनी भूषविले.तर कार्यक्रमाचे प्रमुख पाहुणे म्हणून श्री.एन.एम.गुरव उपस्थित होते.

            वकृत्व स्पर्धेमध्ये एकूण चार विद्यार्थ्यांनी सहभाग नोंदवून श्री गुरु तेग बहादूर साहेबजी यांच्या जीवनकार्य,त्यांचे धर्मस्वातंत्र्यासाठी दिलेले बलिदान,तसेच समाजासाठी दिलेला त्याग याविषयी प्रभावीपणे विचार मांडले.

            निबंध स्पर्धेसाठी एकूण २० विद्यार्थ्यांनी सहभाग घेतला असून,त्यांनी गुरु तेग बहादूर साहेबजी यांच्या शौर्य,त्याग व मानवतावादी विचारांवर सविस्तर लेखन केले.गीत गायन स्पर्धेमध्येही विद्यार्थ्यांनी उत्स्फूर्त सहभाग नोंदवत प्रेरणादायी गीतांचे सादरीकरण केले.

            यावेळी विद्यार्थ्यांना श्री गुरु तेग बहादूर साहेबजी यांच्या जीवनावर आधारित माहितीपर डॉक्युमेंटरी दाखविण्यात आली.या चित्रफितीच्या माध्यमातून विद्यार्थ्यांना त्यांच्या शहीदीचे ऐतिहासिक महत्त्व,३५० व्या शहीदी समागम वर्षाचे औचित्य आणि आजच्या समाजात त्यांच्या विचारांचे असलेले महत्व समजावून सांगण्यात आले.

            कार्यक्रमाच्या अध्यक्षीय भाषणात श्री.एस.एम.चव्हाण यांनी श्री गुरु तेग बहादूर साहेबजी यांच्या बलिदानामुळेच भारतात सर्व धर्मांना समान स्वातंत्र्य लाभले,असे सांगत विद्यार्थ्यांनी त्यांच्या विचारांपासून प्रेरणा घेऊन जीवनात सत्य, धैर्य व मानवतेचे मूल्य जपावे,असे आवाहन केले.प्रमुख पाहुणे श्री.एन.एम. गुरव यांनीही गुरु तेग बहादूर साहेबजी यांच्या शौर्यगाथेचा उल्लेख करून अशा उपक्रमांमुळे विद्यार्थ्यांमध्ये राष्ट्रप्रेम व नैतिक मूल्यांची रुजवण होते,असे मत व्यक्त केले.

            या उपक्रमामुळे विद्यार्थ्यांमध्ये इतिहासाची जाण,अभिव्यक्ती कौशल्यांचा विकास तसेच सामाजिक व नैतिक मूल्यांची जाणीव निर्माण झाली असून,शाळेतील शिक्षक,शिक्षकेतर कर्मचारी व विद्यार्थ्यांनी या कार्यक्रमाच्या यशस्वी आयोजनासाठी विशेष परिश्रम घेतले.

#गुरुतेगबहादूर 

#हिंददीचादर