महामहीम राज्यपाल भगत सिंह कोश्यारी यांनी घेतले आई तुळजाभवानीचे दर्शन

उस्मानाबाद,दि.26,(जिमाका)- महामहीम राज्यपाल भगत सिंह कोश्यारी यांनी आज महाराष्ट्राची कुलदेवता आई श्रीतुळजाभवानी मातेचे मनोभावे दर्शन घेतले.
      यावेळी जिल्हाधिकारी दीपा मुधोळ-मुंडे, पोलीस अधीक्षक राज तिलक रौशन, उपविभागीय अधिकारी रामेश्वमर रोडगे, उपविभागीय पोलिस अधिकारी डॉ. टिपरसे, तहसिलदार सौदागर तांदळे, योगिता कोल्हे, नगरपालिका मुख्याधिकारी आशिष लोकरे,मंदिर प्रशासनाचे श्री. झंपलवाड, श्री.इंतूले, श्री. गणेश मोटे आदींची उपस्थिती होती.

93 व्या अखिल भारतीय मराठी साहित्य संमेलनाचे पद्मश्री ना. धों. महानोर यांच्या हस्ते होणार उद्घाटन

*स्वागताध्यक्ष नीतीन तावडे यांची माहिती*

उस्मानाबाद, दि. 13 -
जगातील मराठी भाषिकांना आपल्या साहित्यप्रतिभेने गेली पन्नास वर्षापासून मोहिनी घालणारे रानकवी पद्मश्री ना. धों. महानोर यांच्या हस्ते  93 व्या अखिल भारतीय मराठी साहित्य संमेलनाचे उद्घाटन दि. 10 जानेवारी 2020 रोजी होणार असल्याची माहिती संमेलनाचे स्वागताध्यक्ष नीतीन तावडे यांनी दिली. उस्मानाबादकरांच्या विनंतीचा मान राखून त्यांनी संमेलनाच्या उद्घाटनाला येण्याचे मान्य केले आहे. त्यांच्या सहवासामुळे साहित्यक्षेत्रातील प्रतिभेला आणि नवोदित लेखक, कवींना ऊर्जा मिळेल, असे त्यांनी सांगितले.

अखिल भारतीय मराठी साहित्य महामंडळाचे 93 वे अखिल भारतीय मराठी साहित्य संमेलन 10, 11, 12 जानेवारी 2020 रोजी उस्मानाबाद येथे होत आहे. या संमेलनाची आयोजक मराठवाडा साहित्य परिषद उस्मानाबाद शाखेच्या वतीने जय्यत तयारी सुरु आहे. संमेलनाध्यक्ष पदी फादर फ्रान्सिस दिब्रिटो यांची यापूर्वीच एकमताने निवड झालेली आहे. साहित्य संमेलन अधिकाअधिक अविस्मरणीय होण्यासाठी आयोजक समितीमार्फत आखणी सुरू आहे. संमेलनाचे उद्घाटक म्हणून ज्येष्ठ कवी पद्मश्री ना. धों. महानोर यांना निमंत्रित करण्यात आले होते. उस्मानाबादकरांच्या विनंतीला मान देऊन त्यांनी उद्घाटन सोहळ्यास येण्याचे मान्य केले आहे.

महानोर यांच्या लेखणीतून साकारलेली अजिंठा, कापूस खोडवा, गंगा वाहू दे निर्मळ, जगाला प्रेम अर्पावे, त्या आठवणींचा झोका, दिवेलागणीची वेळ, पळसखेडची गाणी, पक्षांचे लक्ष थवे, पानझड, पावसाळी कविता, यशवंतराव चव्हाण, रानातल्या कविता, शरद पवार आणि मी, शेती, आत्मनाश व संजीवन ही पुुस्तके वाचकांचा मनाचा ठाव घेतात.

जैत रे जै, सर्जा, एक होता विदूषक, अबोली, मुक्ता इत्यादी चित्रपटांसाठी त्यांनी गीतलेखन केले. ही गाणी मराठी रसिकजनांच्या ओठी आजही कायम आहेत.

ना. धों. महानोर यांना भारत सरकारने 1991 साली पद्मश्री पुरस्काराने गौरविण्यात आलेले आहे.  200 साली त्यांच्या पानझड या पुस्तकास साहित्य अकादमी पुरस्कार आणि 2009 साली कुसुमाग्रज प्रतिष्ठानतर्फे जनस्थान पुरस्काराने सन्मानित करण्यात आलेले आहे.

संमेलनात तीन दिवस चालणार्‍या विचारमंथनातून साहित्यप्रतिभेला नवी दिशा निश्चित मिळू शकणार आहे. संमेलनाची रूपरेषा निश्चित करण्याचे काम अंतिम टप्प्यात असून लवकरच ती जाहीर करण्यात येणार आहे. संमेलनाचे उद्घाटक म्हणून ना. धों. महानोंर यांच्या निवडीचे आयोजक मराठवाडा साहित्य परिषदेचे पदाधिकारी, सदस्य तसेच मराठवाड्यातील साहित्यिक, विविध संस्था, संघटनांनी स्वागत केले आहे.

विभागीय माहिती कार्यालयात “संविधान दिन” साजरा

लातूर,दि.26:- येथील विभागीय माहिती  कार्यालय व जिल्हा माहिती कार्यालयाच्या संयुक्त विद्यमाने  उपसंचालक (माहिती) यांच्या दालनात भारतीय “संविधान दिन” निमित्त  उपसंचालक (माहिती) यशवंत भंडारे यांच्या उपस्थितीत संविधान उद्देशिकेचे सामूहीक वाचन केले. यावेळी लातूरचे जिल्हा माहिती अधिकारी सुनील सोनटक्के, उस्मानाबादचे जिल्हा माहिती अधिकारी मनोज शिवाजी सानप व हिंगोलीचे जिल्हा माहिती अधिकारी अरुण सूर्यवंशी आणि कर्मचारी उपस्थित होते.

यावेळी प्रथम श्री. यशवंत भंडारे यांनी भारतीय संविधानाचे महत्व विशद केले. यावेळी विभागीय माहिती कार्यालयातील सर्वश्री माहिती सहाय्यक मखदूम काझी, लेखापाल अशोक माळगे, वरिष्ठ लिपीक चंद्रकांत कारभारी,श्रीमती मनिषा कुरुलकर, श्रीमती विशाखा शेंडगे, लेखालिपीक चंद्रकांत गोधणे, अहमद बेग,तांत्रिक सहाय्यक भीमा पडवळ, सिनेयंत्र चालक अश्रुबा सोनवणे, वाहन चालक प्रविण बिदरकर, युसूफ मौलाना, संदेश वाहक बालाजी केंद्रे, कमीम शेख, अशोक बोर्डे,श्रीमती गंगा देशमुख आदी उपस्थित होते.

जिल्हयाती सर्व शाळा महाविद्यालयांनी केले लोकराज्यचे सामूहिक वाचन

*जवळपास 1हजार885शाळा-महाविद्यालये,10हजार शिक्षक,3लाख विद्यार्थ्यांचा सहभाग तर दोन शाळा झाल्या “लोकराज्यशाळा”*
   उस्मानाबाद,दि.14(जिमाका):-  "एकाच दिवशी एकाच वेळी" ही संकल्पना केंद्रस्थानी ठेवून उस्मानाबाद जिल्ह्यातील सर्व शाळा व महाविद्यालयांमध्ये दिनांक 14 नोव्हेंबर 2019 रोजी सकाळी 10:30 ते 11:00 या वेळेत शासनाचे मुखपत्र लोकराज्य मासिकातील पंडित नेहरू यांच्यावरील लेखाचे सामूहिक वाचन हा उपक्रम उपक्रम राबविण्याचे निश्चिात करण्यात आले होते. त्यास सकारात्मक प्रतिसाद देत जिल्हयातील सर्व शाळा व महाविद्यालयांमध्ये लोकराज्यचे सामूहिक वाचन संपन्न झाले. जवळपास 1 हजार 885 शाळा-महाविद्यालयातील जवळपास 10 हजार शिक्षक आणि 3 लाख  विद्यार्थ्यांनी लोकराज्य मासिकांचे सामूहिक वाचन केले. गुगल फॉर्मच्या माध्यमातून संकलित होणारी अधिकृत आकडेवारी लवकरच जाहीर करण्यात येईल.
मागील वर्षीही दि.1 सप्टेंबर 2018 रोजी हा उपक्रम राबविण्यात आला होता.त्यावेळी एकूण 1 लाख 26 हजार 229 शिक्षक, शिक्षकेतर कर्मचारी आणि विद्यार्थ्यांनी मिळून लोकराज्य मासिकाचे एकाच दिवशी एकाच वेळी सामूहिक वाचन केले होते.
    या उपक्रमाचा मुख्य कार्यक्रम आज दि. 14 नोव्हेंबर रोजी सकाळी साडेदहा ते अकरा या वेळेत भोसले हायस्कूल उस्मानाबाद येथे संपन्न झाला.    यावेळी या कार्यक्रमासाठी औरंगाबाद विभागाचे माहिती व जनसंपर्क विभागाचे संचालक गणेश रामदासी, लातूर विभागाचे माहिती व जनसंपर्क चे उपसंचालक यशवंत भंडारे, शिक्षणाधिकारी सविता भोसले, उपशिक्षणाधिकारी सौ. रोहिणी कुंभार, माध्यमिक शिक्षण विभागाचे अधीक्षक दिनकर होळकर, आदर्श शिक्षण प्रसारक मंडळाचे प्रशासकीय अधिकारी श्री. आदित्य पाटील, उपप्रशासकीय अधिकारी संतोष घार्गे, उपमुख्याध्यापक श्री. सिद्धेश्वर कोळी, सहाय्यक शिक्षण उपनिरीक्षक दत्ता त्रय थेटे, विस्ताराधिकारी श्री. संतोष माळी, विस्ताराधिकारी बालाजी यरमुनवाड , विशेष सहाय्यक तानाजी खंडागळे,  अण्णा ई टेक्नो चे प्राचार्य आर .बी .जाधव, पर्यवेक्षक हाजगुडे एन .एन., इंगळे वाय .के., श्रीमती गुंड, के . पी .पाटील आणि तीन हजाराहून अधिक विद्यार्थी शिक्षक, शिक्षकेतर कर्मचारी, नागरिक यांची प्रमुख उपस्थिती लाभली.
****

दिब्रिटो यांची निवड संमेलन यशस्वीतेची पहिली पायरी : ज्येष्ठ साहित्यिक प्राचार्य रा.रं. बोराडे यांचे प्रतिपादन

उस्मानाबाद, दि. 13 -
जानेवारी 2020 मध्ये उस्मानाबाद येथे होत असलेल्या 93 व्या अखिल भारतीय मराठी साहित्य संमेलनाच्या अध्यक्षपदी फादर फ्रान्सिस दिब्रिटो यांची झालेली निवड अत्यंत आनंददायी आहे. व्यक्तीगत पातळीवर दिब्रिटो हे आपले स्नेही आहेत. त्यांच्यासारखा विद्वान लेखक संमेलनाध्यक्ष म्हणून लाभणे हे मराठी साहित्य विश्वाचे भाग्य आहे. दिब्रिटो यांची निवड म्हणजे साहित्य संमेलनाच्या यशस्वीतेची पहिली पायरी असल्याचे प्रतिपादन ज्येष्ठ साहित्यिक प्राचार्य रा. रं. बोराडे यांनी केले.

उस्मानाबाद येथील साहित्य संमेलनाच्या संपर्क कार्यालयास प्राचार्य बोराडे यांनी बुधवारी (दि.13) सदिच्छा भेट दिली. याप्रसंगी स्वागत मंडळाच्या वतीने त्यांचा सन्मान करण्यात आला. यावेळी स्वागताध्यक्ष नीतीन तावडे, कार्यवाह रवींद्र केसकर, कोषाध्यक्ष माधव इंगळे, कार्यकारिणी सदस्य डॉ. सुलभा देशमुख, कमलताई नलावडे, श्रीकांत साखरे, राजेंद्र अत्रे यांच्यासह स्वागत मंडळाचे सदस्य उपस्थित होते.

उस्मानाबादकरांना संमेलनाचे यजमानपद मिळाले, ही मराठवाड्यासाठी समाधानाची बाब आहे. उस्मानाबाद जिल्ह्याशी आपले जिव्हाळ्याचे संबंध आहेत. आपले जन्मगावच उस्मानाबाद जिल्ह्यातील आणि सासुरवाडी देखील उस्मानाबाद आहे. त्यामुळे आपण साहित्य संमेलनाच्या आयोजनातील एक जबाबदार घटक असल्याचेही बोराडे यांनी नमूद केले. संमेलन घोषीत झाल्यापासून उस्मानाबादकरांनी सुरू केलेले सकारात्मक प्रयत्न वाखाणण्याजोगे आहेत. त्यामुळे यंदाचे संमेलन मराठी साहित्य विश्वासमोर पथदायी पायंडा निर्माण करील, असा विश्वासही त्यांनी व्यक्त केला.

फादर फ्रान्सिस दिब्रिटो हे मराठी साहित्यातील महत्त्वाचे लेखक आहेत. त्यांची निवड ही अखिल मराठी सहित्य विश्वासाठी अभिमानास्पद बाब आहे. लेखक धर्म, जात, पंथ याच्यापलीकडे जाऊन आपले चिंतन समाजाच्या हितासाठी मांडत असतो. दिब्रिटो हे त्याचे जिवंत उदाहरण आहेत. त्यांचे चिंतनशील विचार मानवी मूल्यांची जोपासना करण्यासाठी आवश्यक असलेली धोरणे निर्माण करण्यासाठी पूरक आहेत. या संमेलनातून असे सकारात्मक प्रयत्न नक्की देशपातळीवर पोहचतील, असा आशावाद त्यांनी व्यक्त केला.

 कार्यक्रमाचे प्रास्ताविक व सूत्रसंचालन राजेंद्र अत्रे यांनी केले. तर आभारप्रदर्शन रवींद्र केसकर यांनी केले.

*संमेलनाध्यक्ष तीन दिवसांचे नव्हे, वर्षभराचे पद*

अखिल भारतीय मराठी साहित्य संमेलनाचे अध्यक्षपद केवळ तीन दिवसांपुरते नाही. वर्षभर संमेलनाध्यक्षांनी आपल्या संशोधनातून, चिंतनातून देशातील मराठी साहित्य रसिकांना समृद्ध करण्यासाठी प्रयत्न करणे अपेक्षित आहे. वयोमानानुसार ही दगदग आता आपल्याला जमणार नाही, म्हणून संमेलनाध्यक्ष पदासाठी आपण विनम्रपणे नकार दिला. त्यातून एक सकारात्मक पायंडा निर्माण व्हावा अशी अपेक्षा आहे. निवडणूक प्रक्रियेतून संमेलनाध्यक्षांची निवड होऊ नये अशी भूमिका यापूर्वी आपण घेतली होती. महामंडळाने त्यात बदल करुन सन्मानाने संमेलनाध्यक्षांची निवड सुरु केली आहे. त्यामुळेच फादर फ्रान्सिस दिब्रिटो यांच्यासारख्या सम्यक लेखकाला उस्मानाबाद येथील साहित्य संमेलनाचे अध्यक्षपद भूषविण्याचा बहुमान लाभला असल्याचे मत प्राचार्य रा.रं. बोराडे यांनी व्यक्त केले.

93 व्या अखिल भारतीय मराठी साहित्य संमेलनाच्या बोधचिन्हाचे प्रकाशन

सर्वांच्या सक्रिय सहभागातून साहित्य संमेलन यशस्वी करु : जिल्हाधिकारी दीपा मुधोळ-मुंढे
उस्मानाबाद, दि. 07 - उस्मानाबाद हा ऐतिहासिक वारसा लाभलेला जिल्हा आहे. येथे होत असलेले 93 वे अखिल भारतीय मराठी साहित्य संमेलन सर्वांच्या सक्रिय सहभागातून यशस्वी करु या, अशी ग्वाही जिल्हाधिकारी दीपा मुधोळ-मुंडे यांनी दिली.
उस्मानाबाद येथे 10, 11, 12 जानेवारी 2020 रोजी होत असलेल्या 93 व्या अखिल भारतीय मराठी साहित्य संमेलनाच्या बोधचिन्हाचे प्रकाशन गुरूवार, 7 नोव्हेंबर 2019 रोजी सकाळी 10.30 वाजता जिल्हाधिकारी दीपा मुधोळ-मुंढे यांच्या हस्ते करण्यात आले. यावेळी त्या बोलत होत्या. कार्यक्रमास जिल्हा पोलीस अधीक्षक राजतिलक रोशन, जिल्हा परिषदेचे उपमुख्य कार्यकारी अधिकारी डॉ. संजय तुबाकले यांची प्रमुख उपस्थिती होती.
पुढे बोलताना जिल्हाधिकारी दीपा मुधोळ-मुंढे म्हणाल्या, उस्मानाबाद येथे होणारे संमेलन हे सर्वार्थाने वेगळे ठरणार आहे. उस्मानाबाद जिल्ह्यातील पर्यटनस्थळे पाहण्याची संधी साहित्यिक, साहित्यप्रेमींना लाभणार आहे. त्यासाठी आवश्यक ते नियोजन संयोजक समितीने करावे. आवश्यक तेथे प्रशासनाचे सक्रिय योगदान राहील, असेही त्या म्हणाल्या.
जिल्हा पोलीस अधीक्षक राजतिलक रोशन म्हणाले, साहित्य संमेलनाच्या बोधचिन्हातून  ऐतिहासिक संदेश दिला असून ते संस्मरणीय ठरणार आहे. संमेलनाच्या माध्यमातून उस्मानाबादचा ऐतिहासिक, सांस्कृतिक वारसा सर्वांसमोर येईल, असेही ते म्हणाले.
तत्पूर्वी मनोगतात संमेलनाचे स्वागताध्यक्ष नीतीन तावडे यांनी साहित्य संमेलन आयोजनाबाबत माहिती दिली. प्रास्ताविक संमेलनाचे प्रमुख कार्यवाह रवींद्र केसकर यांनी केले. सुत्रसंचालन दौलत निपाणीकर तर आभारप्रदर्शन प्राचार्य डॉ. अनार साळुंखे यांनी केले. कार्यक्रमास जिल्हा माहिती अधिकारी मनोज सानप, संमेलनाचे कोषाध्यक्ष माधव इंगळे, संमेलन कार्यकारिणी सदस्य कमलताई नलावडे, डॉ. अभय शहापूरकर, प्राचार्य डॉ. सुलभा देशमुख, राजेंद्र अत्रे, आशिष मोदाणी, बालाजी तांबे, मीना महामुनी, इलियास पीरजादे, युवराज नळे, शेषनाथ वाघ यांच्यासह शहर व परिसरातील साहित्यिक, साहित्यप्रेमी नागरिक, महिला, पत्रकार मोठ्या संख्येने उपस्थित होते.

बोधचिन्ह निर्मितीबद्दल विजयकुमार यादव यांचा सन्मान
93 व्या अखिल भारतीय मराठी साहित्य संमेलन हे संतश्रेष्ठ गोरा कुंभार यांच्या पावन भूमीत होत आहे. या पार्श्वभूमीवर संमेलनाच्या बोधचिन्हामध्ये संत  गोरा कुंभार यांची हाती चिपळ्या घेऊन भक्तीरसात तल्लीन झालेली प्रतिमा साकारण्यात आलेली आहे. तसेच संत गोरा कुंभार रचित त्यांच्या साहित्यप्रतिभेची आठवण करुन देणार्‍या ’म्हणे गोरा कुंभार जीवनमुक्त होणे जग हे करणे शहाणे बापा‘ ह्या ओळी लक्ष वेधून घेतात. उस्मानाबाद येथील विजयकुमार यादव यांनी निर्मित केलेल्या बोधचिन्हाची निवड आयोजक समितीने केलेली आहे. साहित्य संमेलनासाठी दिलेल्या योगदानाबद्दल यादव यांचा जिल्हाधिकारी दीपा मुधोळ-मुंढे यांच्या हस्ते प्रकाशन सोहळ्यात पुष्पगुच्छ देऊन सन्मान करण्यात आला.

म्हाडाच्या घरकुल सोडतीत 195 लाभार्थी ठरले भाग्यवान

लातूर, दि.5:- औरंगाबाद गृहनिर्माण व क्षेत्र विकास मंडळ (म्हाडा) औरंगाबादच्या वतीने प्रधानमंत्री आवास योजनेंतर्गत लातूर जिल्हयातील अत्यल्प उत्पन्न गटातील 736 सदनिकेसाठी म्हाडाचे सभापती संजय केनेकर यांच्या उपस्थितीमध्ये सोडत झाली.या योजनेत पात्र ठरलेल्या सर्व 195 लाभार्थ्यांना म्हाडाची घरे मिळणार असल्याने हे सर्व भाग्यवान ठरलं आहेत.
यावेळी महापौर सुरेश पवार ,मुख्याधिकारी  आण्णासाहेब शिंदे, महापालिका गटनेता शैलेश गोजमगुंडे, कार्यकारी अभियंता बांधकाम जी.एस. देवणीकर, समाजकल्याण अधिक्षक शाहुराज कांबळे, पत्रकार हरी तुगावकर, अर्जदार पुरुष प्रतिनिधी सुभाष हरबडे, अर्जदार स्त्री प्रतिनिधी श्रीमती ज्योती आचार्य, उपमुख्याधिकारी म्हाडा औरंगाबाद जयकुमार नामेवार, उपअभियंता म्हाडा लातूर मिलिंद अटकळे,मिळकत व्यवस्थापक म्हाडा औरंगाबाद एस.एल.गायकवाड उपस्थित होते.
यावेळी सभापती श्री.केनेकर म्हणाले की, ज्या प्रमाणे एलआयसीच्या लोकांच्या आयुष्याला आधार मिळत आहे. त्याप्रमाणे अत्यल्प व मध्यम उत्पन्न गटांतील लोकांना स्वत:च्या घरांसाठी म्हाडाचा आधार मिळत आहे. सर्व महापालिका ,नगर पालिका व म्हाडा यांनी संयुक्तपणे घरकुलांसाठी  काम केल्यास नागरी भागात एक ही बेघर व्यक्ती  दिसणार नाही, असे त्यांनी सांगितले.
म्हाडामार्फत स्थानिक स्वराज्य संस्थांना सोबत घेऊन अधिकृत घरे निर्माण केली जात आहेत. हे काम अधिक चांगल्या पध्दतीने करण्याचा प्रयत्न असून यातून पुढील काळात नागरी भागात अनाधिकृत वसत्या  वाढणार नाहीत. तरी अत्यल्प व मध्यम उत्पन्न गटांतील जास्तीत जास्त लोकांनी म्हाडाच्या घरकुल योजनेत सहभाग नोंदविण्याचे आवाहन श्री. केनेकर यांनी केले. तसेच लातूर जिल्हयात 23 हजार 800 बेघर असून लातूर शहरात सुमारे  6 हजार बेघर असल्याची माहिती त्यांनी दिली.
लातूर शहरातील अतिरिक्त एम.आय.डी.सी. भागात म्हाडाच्या 736 सदनिका तयार होत आहेत. याकरिता पात्र असलेल्या 195 लोकांना म्हाडाच्या घराची लॉटरी लागलेली आहे. या सोडत कार्यक्रमाचे प्रास्ताविक मुख्याधिकारी आण्णासाहेब शिंदे यांनी केले. कार्यक्रमाचे सूत्रसंचालन श्री. रावळे व बिराजदार यांनी केले .तर कार्यक्रमाच्या यशस्वीतेसाठी म्हाडाचे विनय ठोंबरे, शिवकांत बाळाळसूरे, एस.पी. ढोले, एच.बी. देशमुख, जे.आर. मोमीन, ताटे, महेश वैकुंटे यांनी परिश्रम घेतले.

                                    ****

लोहा-कंधार तालुक्यातील पिकांच्या नुकसानीची मंत्र्यांकडून पाहणी

नांदेड दि. 5 :- राज्याचे सार्वजनिक बांधकाम (सा.उ.), सार्वजनिक आरोग्य व कुटुंब कल्याण मंत्री एकनाथ शिंदे, उद्योगमंत्री सुभाष देसाई, रोजगार हमी आणि फलोत्पादन मंत्री जयदत्त क्षीरसागर यांच्यासह शिवसेना प्रमुख उध्दव ठाकरे यांनी नांदेड जिल्ह्यातील परतीच्या पावसामुळे बाधित झालेल्या शेतातील पिकांची पाहणी करुन शेतकऱ्यांशी संवाद साधला.
या सर्व मान्यवरांनी लोहा तालुक्यातील जाणापुरी, सोनखेड, अंबेसांगवी, किरोडा आणि कंधार तालुक्यातील गुलाबवाडी, घोडज येथील अतिवृष्टी व बेमोसमी पावसामुळे बाधित झालेल्या सोयाबीन, कापूस, ज्वारी यासह अन्य पिकांची पाहणी करुन शेतकऱ्यांशी संवाद साधला.
जिल्ह्यात अवकाळी पावसामुळे हाती आलेले संपूर्ण पिकं वाया गेल्याने शेतकऱ्यांचे नुकसान झाले आहे. शेतकऱ्यांनी आलेल्या संकटामुळे खचून न जाता धैर्याने सामोरे जावे. आपणास मदत मिळवून देण्यासाठीच हा पाहणी दौरा करत आहोत. आम्ही आपल्या पाठीशी खंबीरपणे उभे असून नुकसान झालेल्या शेतकऱ्यांना सर्वतोपरी मदत करण्यासाठी प्रयत्न करण्यात येणार आहेत. शासन आणि प्रशासन आपल्या पाठीशी खंबीरपणे उभे आहे. स्थानिक पातळीवर आमचे कार्यकर्ते प्रशासनाशी संपर्क साधून आहेत, असा दिलासाही उध्दव ठाकरे यांनी दिला.
परतीच्या पावसामुळे शेतकऱ्यांसमोर संकट उभे टाकले आहे, याची जाणीव झाल्यामुळेच आम्ही आपली भेट घेऊन धीर देण्यासाठी आलो आहोत. शासनातर्फे योग्य अशी मदत मिळण्यासाठी आम्ही प्रयत्न करणार आहोत. आता राज्य शासनाने दहा हजार कोटी रुपयांची आपल्या मदतीसाठी तरतूद केली आहे. यात आणखी वाढ करण्याचे प्रयत्न केले जातील, असे सांगून मंत्री महोदयांनी नुकसानग्रस्त शेतकऱ्यांना सर्वतोपरी मदत देण्यासाठी प्रयत्न केले जातील, असा विश्वास दिला.
या पाहणी दौऱ्यात माजी खासदार चंद्रकांत खैरे, आमदार बालाजी कल्याणकर, जिल्हाधिकारी अरुण डोंगरे, जिल्हा परिषदेचे मुख्य कार्यकारी अधिकारी अशोक काकडे, जिल्हा अधीक्षक कृषि अधिकारी आर. बी. चलवदे, उपविभागीय अधिकारी पी. एस. बोरगावकर, संबंधित तालुक्याचे तहसीलदार, तालुका कृषी अधिकारी, कर्मचारी, पदाधिकारी उपस्थित होते.
***

अतिवृष्टीमुळे नुकसान झालेल्या शेती पिकाची पालकमंत्री रामदास कदम यांच्याकडून पाहणी

               नांदेड, दि. 3 :- जिल्ह्यात परतीच्या पावसामुळे अतिवृष्टी होऊन शेतकऱ्यांच्या शेतातील शेती पिकाचे मोठ्या प्रमाणावर नुकसान झाले आहे. त्यामुळे पालकमंत्री रामदास कदम यांनी आज जिल्ह्यात दौरा करुन अतिवृष्टीमुळे पिक नुकसान परिस्थितीची पाहणी करुन शेतकऱ्यांशी संवाद साधला.

               राज्याचे पर्यावरण मंत्री तथा नांदेड जिल्ह्याचे पालकमंत्री रामदास कदम यांनी बिलोली तालुक्यातील लोहगाव, मुखेड तालुक्यातील सलगरा, नायगाव तालुक्यातील कृष्णूर, नांदेड तालुक्यातील कामठा खु., गाडेगाव, मालेगाव यासह विविध गावांना भेटी देऊन सोयाबीन, ज्वारी, कापूस यासह अन्य शेती पिकांच्या नुकसानीची पाहणी केली, त्याप्रसंगी ते बोलत होते.

               यावेळी आमदार रामपाटील रातोळीकर, आमदार राजेश पवार, आमदार बालाजी कल्याणकर, आमदार मोहन हंबर्डे, माजी आमदार सुभाष साबणे, जिल्हाधिकारी अरुण डोंगरे, जिल्हा परिषदेचे मुख्य कार्यकारी अधिकारी अशोक काकडे, जिल्हा अधीक्षक कृषी अधिकारी आर. बी. चलवदे, संबंधीत तालुक्याचे तहसिलदार, विविध विभागाचे सर्व संबंधित अधिकारी पदाधिकारी व शेतकरी मोठ्या संख्येने उपस्थित होते.

        पालकमंत्री रामदास कदम यांनी शेतकऱ्यांच्या शेतावर जाऊन अतिवृष्टीमुळे झालेल्या शेती पिकाच्या नुकसानीची प्रत्यक्ष पाहणी केली. तसेच तेथील शेतकऱ्यांशी संवाद साधून त्यांच्या समस्या ऐकून घेतल्या. यावेळी शासन शेतकऱ्यांच्या पाठीशी पूर्णपणे उभे असून नुकसान झालेल्या पिकांच्या नुकसानीचे पंचनामे प्रशासन त्वरित पूर्ण करणार आहे. पावसामुळे जवळपास शंभर टक्के शेती पिकांचे नुकसान झालेले दिसून येत आहे. त्यामुळे शेतकऱ्यांना जास्तीत जास्त मदत देण्यासाठी शासनाकडे पाठपुरावा करणार असल्याची ग्वाही त्यांनी दिली.

               जिल्हाधिकारी अरुण डोंगरे यांनीही अतिवृष्टीमुळे नुकसान झालेल्या शेतकऱ्यांच्या शेती पिकांचे पंचनामे तात्काळ पूर्ण करण्याचे आदेश यंत्रणेला दिले आहेत. या आदेशात तलाठी, ग्रामसेवक व कृषी सहायकांनी तात्काळ पंचनामे करावेत. या कामात कोणत्याही प्रकारचा हलगर्जीपणा केल्यास कठोर कारवाई करण्यात येईल, असे म्हटले आहे.  

            जिल्ह्यात परतीच्या अवेळी पावसामुळे शेतातील पिकांचे  मोठ्या प्रमाणात नुकसान झाले आहे. त्यामुळे शेती पिकांच्या नुकसानीबाबत शेतकऱ्यांचे दावे भरुन मंजुरीसाठी विमा कंपनीकडे त्वरित पाठविण्यात यावेत. या प्रकरणी तहसीलदार, गटविकास अधिकारी आणि तालुका कृषि अधिकारी, नायब तहसीलदार यांनी स्वत: क्षेत्रीय स्तरावर जाऊन पाहणी करावी, अशा सूचनाही जिल्हाधिकारी अरुण डोंगरे यांनी दिल्या आहेत. 

शेतकऱ्यांना त्वरीत दिलासा देण्यासाठी संवेदनशीलतेने सर्वेक्षणाची कामे वेळेत पूर्ण करा - पालकमंत्री रामदास कदम

खरीप हंगामातील पिक नुकसानीचा आढावा

नांदेड दि. 3 :- अवकाळी पावसामुळे शेतीपिकांचे नुकसान झाले असून शेतकऱ्यांना त्वरीत दिलासा देण्यासाठी पिकांच्या सर्वेक्षणाची कामे संवेदनशीलतेने वेळेत पूर्ण करा. यात बाधित शेतकरी वंचीत राहणार नाही याची खबरदारी घ्यावी, असे निर्देश राज्याचे पर्यावरण मंत्री तथा नांदेड जिल्ह्याचे पालकमंत्री रामदास कदम यांनी दिले.

जिल्ह्यात अवकाळी पावसामुळे खरीप हंगामातील झालेल्या शेतीपिकांच्या नुकसानीसंदर्भात आढावा बैठक पालकमंत्री श्री. कदम यांच्या अध्यक्षतेखाली मिनी सह्याद्री शासकीय विश्रामगृह नांदेड येथे घेण्यात आली, त्यावेळी ते बोलत होते.

बैठकीस आमदार बालाजी कल्याणकर, जिल्हाधिकारी अरुण डोंगरे, जिल्हा परिषदेचे मुख्य कार्यकारी अधिकारी अशोक काकडे, अप्पर जिल्हाधिकारी खुशालसिंह परदेशी, निवासी उपजिल्हाधिकारी डॉ. सचिन खल्लाळ, जिल्हा परिषदेचे अतिरिक्त मुख्य कार्यकारी अधिकारी डॉ. शरद कुलकर्णी, जिल्हा अधीक्षक कृषि अधिकारी आर. बी. चलवदे, नांदेड पाटबंधारे मंडळाचे अधीक्षक अभियंता एस. के. सब्बीनवार, जिल्हा उपनिबंधक प्रविण फडणवीस, उपविभागीय अधिकारी लतीफ पठाण, महेश वडदकर, एस. पी. बोरगावकर, शक्ती कदम, शरद झडके यांच्यासह तालुका व जिल्हास्तरावरील विविध विभाग, विमा कंपनीचे अधिकारी, कर्मचारी उपस्थित होते.

बैठकीत पालकमंत्री श्री. कदम पुढे म्हणाले, मराठवाड्यातील शेतकरी कधी ओला तर कधी कोरड्या दुष्काळाला समोर जात आहे. या परिस्थितीत अवकाळी पावसामुळे शेतकऱ्यांच्या पिकांचे मोठे नुकसान झाले आहे. शेतकऱ्यांची ही समस्या लक्षात घेऊन त्यांना तात्काळ मदत देण्यासाठी सर्वांनी संवेदनशीलतेने काम करणे आवश्यक आहे. शेतकऱ्यांना वेळेत मदत देण्यासाठी जिल्ह्यातील पिकांच्या नुकसानीचे पंचनामे वस्तुआस्थितीदर्शक तातडीने येत्या 4 ते 5 दिवसात पूर्ण करावीत. या कामात पिक विमा कंपनीची मोठी जबाबदारी असून शासकीय अधिकाऱ्यांनी केलेले नुकसानीचे पंचनामे विमा कंपनीने ग्राह्य धरावे. तसे लेखी हमीपत्र विमाकंपनीकडून घेण्याचे आदेश पालकमंत्री श्री. कदम यांनी यावेळी दिले.

पालकमंत्री श्री. कदम म्हणाले, शेतकऱ्यांच्या बाधित पिकांची पाहणी प्रत्यक्ष गावात शेतीत जाऊन करतांना सोयाबीनचे जास्त नुकसान झाले असून त्याखालोखाल कापूस, ज्वारी, तूर या मुख्य पिकांबरोबर हळद, केळीसह, काढणी केलेल्या इतर पिकांचे नुकसान झाले आहे. हे लक्षात घेऊन ड्रोन, शुटींग व आवश्यक छायाचित्राद्वारे सर्वेक्षण करावे. शेतकऱ्यांच्या कुटुंबातील सदस्यांना लघु उद्योग उभारणीसाठी उपाय योजना कराव्यात, असे निर्देश देऊन चारा पिकांचे नुकसान झाल्याकने जलसंपदा विभागाने गाळ पेरा क्षेत्रात मका लागवड करावी, प्रकल्पातील पाणीसाठा, रस्त्यांची दूरुस्ती यासह विविध विकास कामांबाबत आढावा घेऊन उपयुक्त सुचना दिल्या.

यावेळी जिल्हाधिकारी अरुण डोंगरे यांनी जिल्ह्यात संबंधीत यंत्रणेकडुन पिक नुकसानीचा पंचनामा करण्यात येत असून सद्यस्थितीत जवळपास 30 टक्कें पंचनामे पूर्ण झाली आहेत. नांदेड जिल्हायात 16 तालुक्या‍तील 1 हजार 546 गावांमध्ये एकूण 7 लाख 95 हजार 800 शेतकरी खातेदार आहेत. ज्यांचे पेरणी लायक क्षेत्र 8 लाख 10 हजार 661 हेक्ट आर. असून पेरणी खालील क्षेत्र 7 लाख 58 हजार 405 हे. आर. इतके आहे. ज्यापैकी 1 हजार 488 गावामधील एकूण 5 लाख 43 हजार 553 शेतकऱ्यांचे 4 लाख 11 हजार 372 हे. आर. क्षेत्र बाधीत झाल्याचा प्राथमिक नजर अंदाज आहे. ज्यापैकी सोयाबीन क्षेत्र 2 लाख 41 हजार 498 हे., कापूस 1 लाख 17 हजार 195 हे., ज्वारी 22 हजार 124 हे., तुर 6 हजार 006 हे. व इतर पिके 24 हजार 549 हेक्टर असल्याचा प्राथमिक अंदाज आहे. त्यामध्ये वाढ होण्याची शक्यता असल्याचे त्यांनी सांगितले. शेतकऱ्यांचे मदतीसाठी जिल्हास्तरावर यासंबंधाने तक्रार, हरकतीसाठी हेल्प‍लाईन क्रमांक 02462- 235077 कार्यान्वीत करण्यात आल्याची माहिती देण्यात आली.

लातूर विभागात एकता दौड ला उर्त्स्फूत प्रतिसाद

        

लातूर :  सरदार वल्लभभाई पटेल यांच्या जयंतीनिमित्त लातूर विभागातील लातूर, उस्मानाबाद, नांदेड आणि हिंगोली जिल्ह्यात प्रशासनाच्या वतीने 'रन फॉर युनिटी' ( एकता दौड) चे आयोजन करण्यात आले होते. या दौड ला लातूर विभागात उर्त्स्फूत प्रतिसाद मिळाला आहे.  हा दिवस देशभरात ‘ राष्ट्रीय एकता दिवस ’ म्हणून साजरा केला जातो.

लातूर येथे जिल्हा क्रीडा संकुलाच्या प्रांगणात जिल्हाधिकारी श्रीकांत यांनी एकता दौड  ला हिरवा झेंडा दाखवून शुभारंभ केला. ही दौड जिल्हा क्रीडा संकुल येथून शिवाजी चौक (ब्रीज वरुन)  हुतात्मा स्मारक (टॉऊन हॉल)  मैदानावर आली. या दौड मध्ये शालेय, महाविद्यालयीन विदयार्थी, खेळाडू, नागरिक, अधिकारी व कर्मचारी यांनी  ऊस्फुर्त सहभाग घेतला . या दौड मधून राष्ट्रीय एकात्मतेचा संदेश देण्यात आला.

हुतात्मा स्मारक मैदानावर सरदार वल्लभाई पटेल यांची जयंती व इंदिरा गांधी यांची  पुण्यतिथी निमित्त त्यांच्या प्रतिमेचे पूजन जिल्हाधिकारी श्रीकांत यांनी करुन अभिवादन केले. यावेळी उपस्थित नागरिकांना जिल्हाधिकारी श्रीकांत यांनी राष्ट्रीय एकात्मतेची शपथ दिली.या एकता दौड मध्ये लातूरकर नागरिक मोठया संख्येने सहभागी होऊन दौडला ऊस्फूर्त प्रतिसाद दिला. दौडचा समारोप हुतात्मा स्मारक येथे करण्यात आला.

उस्मानाबाद येथे जिल्हाधिकारी  दीपा मुधोळ-मुंडे यांनी हिरवा झेंडा दाखविल्यानंतर ही दौड मध्यवर्ती प्रशासकीय इमारत येथून सुरु होवून बार्शी नाका-लेडीज क्लब-छ.शिवाजी हायस्कूल-त्रिशरण चौक-आंबेडकर पुतळा या मार्गाने जावून पोलीस मुख्यालय येथे संपन्न झाली व समारोप प्रसंगी उपस्थित सर्वांनी राष्ट्रीय एकतेची शपथ घेतली. या संपूर्ण दौड दरम्यान सहभागी मान्यवरांनी  राष्ट्र प्रेम व्यक्त होणाऱ्या, देशाच्या एकात्मतेविषयी प्रोत्साहन देणाऱ्या घोषणा दिल्या.

 या राष्ट्रीय दौडमध्ये निवासी उपजिल्हाधिकारी राजेंद्र खंदारे, पोलीस उपअधीक्षक मोतीराम राठोड, श्रीमती शेख,कार्यकारी अभियंता अनिल सगर, उपअभियंता श्री. गपाट, जिल्हा पशुसंवर्धन अधिकारी डॉ. नामदेव आघाव, आत्माचे प्रकल्प संचालक जितेंद्र शिंदे, उपसंचालक आत्माराम मलगुंडे, जिल्हा क्रीडा अधिकारी भाग्यश्री बिले, सहाय्यक जिल्हा क्रीडा अधिकारी अशोक बनसोडे, तालुका क्रीडा अधिकारी सारिका काळे, यांच्यासह उस्मानाबाद शहरातील युवा मंडळ,क्रीडा मंडळ, महिला मंडळ, सामाजिक कार्यकर्ते, क्रीडाप्रेमी, नागरिकांनी उत्स्फूर्त सहभाग नोंदविला.

 नांदेड येथे एकता दौडच्या प्रारंभी महात्मा गांधी यांच्या प्रतिमेचे पूजन करुन त्यांच्या पुतळ्याला अभिवादन करण्यात आले. राष्ट्रपिता महात्मा गांधी यांच्या पुतळ्यास महानगरपालिका आयुक्त लहुराज माळी, पोलीस अधीक्षक विजयकुमार मगर यांनी पुष्पहार अर्पण करुन अभिवादन केले. यानंतर एकता दौडचा हिरवा झेंडा दाखवून प्रारंभ करण्यात आला. 

दौडमध्ये महानगरपालिका आयुक्त लहुराज माळी, पोलीस अधीक्षक विजयकुमार मगर, अप्पर पोलीस अधीक्षक दत्तराम राठोड, निवासी उपजिल्हाधिकारी डॉ. सचिन खल्लाळ, उपविभागीय पोलीस अधिकारी धनंजय पाटील, जिल्हा क्रीडा अधिकारी राजेश मारावार, क्रीडा अधिकारी किशोर पाठक, गुरुदिपसिंघ संधू, स्वामी रामनंद तीर्थ मराठवाडा विद्यापीठाचे क्रीडा संचालक डॉ. विठ्ठलसिंघ परिहार, नायब तहसिलदार मुगाजी काकडे, लेखाधिकारी निळकंठ पाचंगे, नेहरु युवा केंद्राचे कुलदिपसिंघ, क्षेत्रीय प्रचार कार्यालयाचे सुमित डोडल, यांच्यासह विविध विभागांचे अधिकारी, कर्मचारी, शालेय विद्यार्थी आदि सहभागी होते. तसेच पोलीस दलाच्या पथकाने वाद्य वृदांसह संचलन करत या दौडमध्ये सहभाग घेतला. महात्मा गांधी पुतळा ते जुना मोंढा टॉवर या ठिकाणाहून एकता दौड मार्गक्रमण झाली. या दौडमध्ये सहभागी घटकांनी राष्ट्रीय एकात्मतेच्या घोषणा दिल्या. दक्षता जनजागृती सप्ताहाच्या निमित्ताने जनजागृतीपर फलक घेवून दौडमध्ये सहभागी झाले.  

    हिंगोली येथे  एकता दौड ची सुरुवात अग्रसेन चौक - बसस्टँड - इंदिरा गांधी चौक - महात्मा गांधी चौक पर्यंत करण्यात आली. यावेळी एकता दौड ला हिंगोली शहराचे नगराध्यक्ष बाबाराव बांगर, राज्य राखीव बलाचे समादेशक मंचक इप्पर, अतिरिक्त पोलीस अधिक्षक यशवंत काळे यांनी हिरवी झेंडी दाखवून एकता दौडचा शुभारंभ केला. यावेळी राज्य राखीव बलाचे अतिरिक्त समादेशक आर.बी. जाधव, नायब तहसीलदार एम.जी खंडागळे, जिल्हा क्रीडा अधिकारी कलीमोद्दीन फारुकी, क्रीडा अधिकारी संजय बेतेवार, मारोती सोनकांबळे, शारीरिक शिक्षण संघटनेचे रमेश गंगावणे, योग विद्यालयाचे रत्नाकर महाजन, आदींची उपस्थिती होती. यावेळी जिल्हा क्रीडा अधिकारी  कलीमोद्दीन फारुकी यांनी उपस्थितांना राष्ट्रीय एकात्मतेची शपथ दिली. या एकता दौड मध्ये राज्य राखीव बलाचे जवान, पोलीस प्रशासनातील अधिकारी-कर्मचारी, महाविद्यालयीन विद्यार्थी-विद्यार्थीनी, नागरिक, खेळाडु, स्वयंसेवी संस्था, क्रीडा मंडळे, पत्रकार बंधू आदी सहभागी झाले होते.

                                                

                                                       000000

पदवीधर मतदारांनी लवकर नाव नोंदणी करावी – विभागीय आयुक्त सुनील केंद्रेकर

 औरंगाबाद विभाग पदवीधर मतदार संघ ‍निवडणूक
          औरंगाबाद, दिनांक ३० (जिमाका) – औरंगाबाद विभाग पदवीधर मतदार संघाच्या निवडणूक कार्यक्रमाबाबत विभागीय आयुक्त तथा मतदार नोंदणी अधिकारी सुनील केंद्रेकर यांनी राजकीय पक्षांशी आज संवाद साधला. तसेच सर्व कार्यालयातील अधिकारी कर्मचारी यांनी पदवीधर मतदार नोंदणी लवकरात लवकर करण्याच्या दृष्टीने येणाऱ्या अडचणींबाबत चर्चा केली.
विभागीय आयुक्त यांच्या दालनात श्री. केंद्रेकर यांच्या अध्यक्षतेखाली बैठक पार पडली. बैठकीस जिल्हाधिकारी उदय चौधरी, उपायुक्त वर्षा ठाकूर, उपायुक्त ‍शिवाजी ‍ शिंदे,  उपजिल्हाधिकारी पांडुरंग कुलकर्णी, विविध राजकीय पक्षांचे पदाधिकारी उपस्थित होते.
मतदार नोंदणी नियम १९६० अंतर्गत नियम ३१ (३) अन्वये महाराष्ट्र विधान परिषदेच्या निवडणुकीसाठी औरंगाबाद विभाग पदवीधर मतदार संघासाठी पात्र मतदारांची नोंदणी करावयाचा कार्यक्रम निवडणूक अधिकारी तथा विभागीय आयुक्त यांनी ०१ ऑक्टोबरपासून जाहीर केलेला आहे. मतदार नोंदणीसाठी एक ऑक्टोबर ते सहा नोव्हेंबर या कालावधीत पात्र पदवी अहर्ता, पात्र तत्सम अर्हता व्यक्तींना नमुना नं.१८ मध्ये मतदार नोंदणीसाठी अर्ज करता येईल. अर्जाचा नमुना तहसील कार्यालय, उपविभागीय अधिकारी कार्यालय, जिल्हाधिकारी कार्यालयामध्ये विनामुल्य उपलब्ध आहे. या नोंदणीसाठी एक नोव्हेंबर २०१९ या अर्हता दिनांकापूर्वी किमान तीन वर्ष अगोदर पात्र पदवी अर्हता अथवा तत्सम पात्र पदविका इ. धारण करणा-या व्यक्तींना अर्ज करता येणार आहे. नमुना १८ च्या अर्जासह मूळ कागदपत्रे अथवा राजपत्रित अधिका-याकडून सांक्षांकित केलेल्या सत्यप्रती सोबत जोडणे आवश्यक आहे. अर्जदार ज्या ठिकाणी अर्ज करेल त्या ठिकाणचा सामान्यत: रहिवासी असावा. अर्जासोबत पदवी परीक्षेची, पदविका परीक्षेचे अंतिम गुणपत्रक देखील ग्राह्य धरले जाईल. मात्र, गुणपत्रकान्वये सदर व्यक्ती पास किंवा उत्तीर्ण झाल्याचे प्रमाणित झाले असले पाहिजे. शासकीय कार्यालयात सामाजिक उपक्रमामध्ये काम करणा-या व्यक्तीच्या अर्हताबद्दल संस्थेकडील अभिलेख पाहून कार्यालय प्रमुखांना मतदार नोंदणीसाठी विहित नमुन्यात प्रमाणपत्र देता येईल. तसेच विद्यापीठांकडील पदवीधारकांची नोंदणी, अभियंत्यांची नोंदणी, विधी अभिकर्त्याची नोंदणी, वैद्यकीय व्यावसायिकांची नोंदणी , सनदी लेखापालांची नोंदणी आदी नोंदणीबाबतचा दाखला अर्जासोबत अर्हतेबाबत पुरावा म्हणून देता येईल. तसेच राजकीय पक्ष संघटना अथवा कोणत्याही व्यक्तीस एका गठ्ठा अर्ज मिळणार नाहीत, तसेच एक गठ्ठा पद्धतीने अर्ज स्वीकारलेही जाणार नाहीत. मात्र, एका कुटुंबासाठी अथवा कार्यालय प्रमुख अथवा संस्थेस त्यांच्या कार्यालयातील कर्मचा-यांसाठी अर्जाची एकत्रित मागणी करता येईल व एकत्रित अर्ज सादर करता येतील.
           प्राप्त मतदारांची प्रारूप यादी २३ नोव्हेंबर रोजी जाहीर करण्यात येऊन २३ नोव्हेंबर ते नऊ डिसेंबरपर्यंत संबंधितांना दावे, हरकती नोंदविता येतील. दिनांक ३० डिसेंबर रोजी मतदारांची अंतिम यादी जाहीर करण्यात येणार आहे. ‍विभागातील सर्व शासकीय कार्यालये, सर्व विद्यापीठे यांनी पदवीधर मतदार नोंदणीला प्राधान्य द्यावे व अधिकाधिक पदवीधर मतदारांची नोंदणी करावी.
जिल्हाधिकारी कार्यालयात आज प्रशिक्षण
जिल्हाधिकारी  कार्यालयात 31 ऑक्टोबर 2019 रोजी उपजिल्हाधिकारी, तहसीलदार यांचे प्रशिक्षण आयोजित करण्यात आले आहे. जिल्हाधिकारी कार्यालयाच्या नियोजन सभागृहात सकाळी अकरा वाजता हे प्रशिक्षण होणार आहे.
******

लातूर विभागात एकता दौड ची तयारी पूर्ण

लातूर : सरदार वल्लभभाई पटेल यांच्या जयंतीनिमित्त लातूर विभागातील लातूर, उस्मानाबाद, नांदेड आणि हिंगोली जिल्ह्यातील जिल्हा प्रशासन व जिल्हा क्रीडा अधिकारी कार्यालय यांच्या संयुक्त विद्यमाने सर्व शासकीय कार्यालय, शाळा यांच्या सहभागाने एकता दौड चे आयोजन करण्यात आले आहे. संबंधित जिल्हा प्रशासनाच्या वतीने तयारी पूर्ण झाली आहे. हा दिवस देशभरात ‘ राष्ट्रीय एकता दिवस ’ म्हणून साजरा केला जातो.

राष्ट्रीय एकात्मता आणि सामाजिक ऐक्याचा संदेश देण्यासाठी दरवर्षी सरदार वल्लभभाई पटेल यांच्या जयंतीनिमित्त 'रन फॉर युनिटी'चे आयोजन करण्यात येते. लोहपुरुष सरदार वल्लभभाई पटेल यांनी भारताच्या स्वातंत्र्य चळवळीमध्ये व तद्नंतर अखंड भारताच्या निर्मितीसाठी दिलेल्या मौलिक योगदानाचा गौरव व्हावा व जनतेला त्यांची कामगिरी प्रेरणादायी ठरावी यादृष्टीने त्यांचा जन्मदिवस राष्ट्रीय एकता दिवस म्हणून साजरा करण्यात येतो. यानिमित्ताने आयोजित दौडद्वारे एकतेचा संदेश देण्यात येणार आहे. दौडमध्ये क्रीडा संघटना, शासकीय कार्यालय,  शाळा,  महाविद्यालयातील विद्यार्थी, स्वयंसेवी संस्था सहभागी होणार आहेत.

लातूर विभागातील लातूर, उस्मानाबाद, नांदेड,  आणि हिंगोली अशा चारही जिल्ह्यात राष्ट्रीय एकता दिवसाच्या निमित्ताने एकतेचा संदेश देण्यासाठी प्रशासनाच्यावतीने गुरुवार दि.31 ऑक्टोबर रोजी ‘एकता दौड’चे आयोजन करण्यात आले आहे.

लातूर येथून गुरुवार, दि. 31 ऑक्टोबर 2019  रोजी सकाळी 7 वाजून 30 मिनीटांनी  राष्ट्रीय एकता दौडचे आयोजन करण्यात आले असून या राष्ट्रीय एकता दौडला टाऊन हॉल येथून सुरुवात होणार आहे. सदर दौड शिवाजी चौक मार्गे जिल्हा क्रीडा संकुल येथे राष्ट्रीय एकतेची शपथ घेवून या दौडचा समारोप होणार आहे.ही यशस्वी करण्यासाठी  जिल्हा प्रशासनाच्या वतीने आणि विविध विभागांच्या वतीने विविध कार्यक्रमाचे आयोजन करण्यात आले आहे. 

उस्मानाबाद जिल्हा प्रशासनाच्या मार्गदर्शनाखाली सकाळी 7 वाजता ही दौड मध्यवर्ती प्रशासकीय इमारत येथून सुरु होवून बार्शी नाका-लेडीज क्लब-छ.शिवाजी हायस्कूल-काळा मारुती चौक-ताजमहल टॉकीज-शिवाजी पुतळा या मार्गाने जावून पोलीस मुख्यालय येथे राष्ट्रीय एकतेची शपथ घेवून या दौडचा समारोप होणार आहे. जिल्हाभर सरदार वल्लभभाई पटेल यांच्या जयंतीनिमित्त भाषण स्पर्धा, राष्ट्रीय एकतेची शपथ तसेच उस्मानाबाद येथे राष्ट्रीय एकता दौड,संचलन,जनजागृतीपर कार्यक्रम अशा कार्यक्रमांचे आयोजन करण्यात आले आहे. यामध्ये जिल्हाधिकारी कार्यालय, जिल्हा पोलीस अधीक्षक जिल्हा परिषद, कार्यालय, जिल्हा माहिती कार्यालय, नेहरु युवा केंद्र, जिल्हा क्रीडा अधिकारी कार्यालय, पतंजली योग समिती, रोटरी क्लब, आर्ट ऑफ लिव्हिंग, मराठवाडा साहित्य परिषद शाखा,उस्मानाबाद, एकता फाऊंडेशन तसेच उस्मानाबाद शहरातील युवा मंडळ,क्रीडा मंडळ, महिला मंडळ, सामाजिक कार्यकर्ते, क्रीडाप्रेमी, शासकीय अधिकारी, कर्मचारी, नागरिकांचा सहभाग असणार आहे. 

 नांदेड येथे सकाळी 7 वाजून 30 मिनीटांनी एकता दौडीचे आयोजन करण्यात आले आहे. या दौडीची सुरुवात महात्मा गांधी यांच्या पुतळ्यास पुष्पहार अर्पण करुन महात्मा गांधी यांच्या पुतळ्यापासून सुरु होणार असून जुना मोंढा टॉवर येथे सरदार वल्लभभाई पटेल यांच्या पुतळ्यास पुष्पहार अर्पण करुन एकता दिनाची शपथ घेवून कार्यक्रमाचा समारोप होणार आहे. अधिकारी, कर्मचारी, विद्यार्थ्यांनी या राष्ट्रीय एकता दौडीमध्ये सहभागी व्हावे, असे जिल्हाधिकारी नांदेड यांनी आवाहन केले आहे.

हिंगोली येथून सकाळी 7 वाजता राष्ट्रीय एकता दौडचे आयोजन करण्यात आले असून या राष्ट्रीय एकता दौडला अग्रसेन चौक ( नांदेड नाका ) येथून सुरुवात होणार आहे. सदर दौड बस स्थानक-इंदिरा गांधी चौक-महेश चौक मार्गे महात्मा गांधी चौक येथे राष्ट्रीय एकतेची शपथ घेवून या दौडचा समारोप होणार आहे. 

सरदार वल्लभभाई पटेल यांच्या जयंतीनिमित्त गुरुवारी राज्यभर एकता दौड

मुंबई, दि. 29 : सरदार वल्लभभाई पटेल यांच्या जयंतीनिमित्त येत्या गुरुवारी (31 ऑक्टोबर २०१९) राज्यात जिल्हा मुख्यालये, महत्त्वाची शहरे आदी विविध ठिकाणी एकता दौडचे आयोजन करण्यात आले आहे. हा दिवस देशभरात ‘राष्ट्रीय एकता दिवस’ म्हणून साजरा केला जातो.

राष्ट्रीय एकात्मता आणि सामाजिक ऐक्याचा संदेश देण्यासाठी दरवर्षी सरदार वल्लभभाई पटेल यांच्या जयंतीनिमित्त 'रन फॉर युनिटी'चे आयोजन करण्यात येते. लोहपुरुष सरदार वल्लभभाई पटेल यांनी भारताच्या स्वातंत्र्य चळवळीमध्ये व तद्नंतर अखंड भारताच्या निर्मितीसाठी दिलेल्या मौलिक योगदानाचा गौरव व्हावा व जनतेला त्यांची कामगिरी प्रेरणादायी ठरावी यादृष्टीने त्यांचा जन्मदिवस राष्ट्रीय एकता दिवस म्हणून साजरा करण्यात येतो. यानिमित्ताने आयोजित दौडद्वारे एकतेचा संदेश देण्यात येणार आहे. दौडमध्ये क्रीडा संघटना, शासकीय कार्यालय, शाळा, महाविद्यालयातील विद्यार्थी, स्वयंसेवी संस्था सहभागी होणार आहेत.

नाशिक विभागातील धुळे, नंदुरबार, जळगाव, अहमदनगर आणि नाशिक अशा पाचही जिल्ह्यात राष्ट्रीय एकता दिवसाच्या निमित्ताने एकतेचा संदेश देण्यासाठी प्रशासनाच्यावतीने ‘एकता दौड’चे आयोजन करण्यात आले आहे. नंदुरबार जिल्ह्यात हुतात्मा उद्यान येथून सकाळी 7.30 वाजता दौडचा शुभारंभ होणार आहे. 21 क्रीडा संघटनांनी या दौडमध्ये सहभाग घेतला आहे. अहमदनगर येथे सकाळी 8 वाजता जिल्हा क्रीडा संकुलाच्या मुख्य प्रवेशद्वारापासून दौडला सुरूवात होईल. टिळकरोडमार्गे आयुर्वेद कॉलेज चौक, रुपीबाई बोरा हायस्कूल मार्ग, दिल्ली गेट, सिद्धीबाग मार्गे पोलीस मुख्यालय येथे एकता दौडचा समारोप होईल.

धुळे येथे सकाळी 8 वाजता जमनालाल बजाज मार्गावरील सरदार वल्लभभाई पटेल उद्यान येथून दौडचा प्रारंभ होणार असून महापालिका जुन्या इमारतीमार्गे जिल्हाधिकारी कार्यालयात दौडचा समारोप होणार आहे. जळगाव येथे देखील एकता दौडचे आयोजन करण्यात येणार आहे. नाशिकमधील छत्रपती शिवाजी महाराज क्रीडा संकुल येथून एकतेची शपथ घेऊन दौडचा शुभारंभ होईल. जिल्हाधिकारी सूरज मांढरे एकतेची शपथ देतील. एमजी रोड, रेडक्रॉस सिग्नल, सीबीएसमार्गे जिल्हा क्रीडा संकुल येथे दौडचा समारोप होणार आहे. एकता दिवसाच्या निमित्ताने देशभक्तीपर गीतांचा कार्यक्रम आयोजित करण्यात आला आहे.

ठाणे जिल्हा प्रशासनाच्या वतीने  31 ऑक्टोबर रोजी स. 8.00 वा. काशिनाथ घाणेकर नाट्यगृह येथे कार्यक्रमाचे आयोजन करण्यात आले आहे. यावेळी एकता दौड बरोबरच राष्ट्रीय एकात्मतेची शपथ घेण्यात येणार आहे. तसेच पोलिस प्रशासनातर्फे मानवंदना आणि संचलन होणार आहे. 

विदर्भात नागपूर येथे ही दौड अमरावती रोड येथील संत तुकडोजी महाराज नागपूर विद्यापीठाच्या  मैदानावर सकाळी 8 वाजता  सुरु होणार आहे. अकोला येथे ही दौड जिल्हा क्रीडा संकुल वसंत देसाई स्टेडीयम येथून सकाळी आठ वाजता सुरु होणार आहे. वाशिम येथे जिल्हा क्रीडा संकुल येथून दौड सुरु होणार असून नवीन शासकीय विश्रामगृह, जिल्हाधिकारी कार्यालय, राजस्थान आर्य महाविद्यालय, सामान्य रुग्णालय मार्गे पुन्हा जिल्हा क्रीडा संकुल येथे आल्यानंतर दौडचा समारोप होईल. बुलडाणा येथे ही दौड जिल्हा पोलीस मैदान येथून सुरु होणार असून शहरातील मुख्य चौकांमधून पुन्हा जिल्हा पोलीस मैदान येथे आल्यानंतर दौडचा समारोप होईल.  याशिवाय इतरही जिल्ह्यांमध्ये दौड सह विविध कार्यक्रमांचे आयोजन करण्यात आले आहे.